ARTAMUGARRIAKen EKINTZA BARDEETAKO POLIGONOAREN AURKAKO XX MARTXAN

Igande honetan, ekainak 3, XX Bardeetako Poligonoaren aurkako Ibilaldiaren amaieran (13:30 inguru) ARTAMUGARRIAK kolektiboak, bake prozesua eta demokrazia partehartzailea sustatzeko ekimen artibistak, BARDEAK-TIBESTI ekintza burutuko du, PAX AVANT! bere kanpainaren barruan eta Tibestiko (Ipar Txad) Toubou herriarekin elkartasunaz.
Ibiltariek hiruki handi bat eratuko dute eta erdian elkarrizketarako aulkien biribila jartzeaz gain gatazken Maiatz edo zuhaitza zutitu egingo da. Ondoren, Toubouen printzearen gutuna irakurriko dugu.
Ekintza osoa irudietan eta www.artamugarriak.org web-orrian bildu eta Google Earthen indexatuko da.
Ekintza honek hasiera ematen dio ArtamugarriaKek Tibesti GKErekin batera diharduen proiektuari, planetako mina-eremurik zabalena den Zouarreko batailaren gertalekuan burutuko dena.
Parte hartzera eta Pax Avant! hedatzera gonbidatzen zaituztegu.

ArtamugarriaK 2007ko maiatzak 31

Ekintza amaierako ArtamugarriaKen agiria

XX Bardeetako Poligonoaren aurkako ibiltariei gure eskerrik beroena ekintza honetan parte hartzeagatik!
XX Bardeetako Poligonoaren aurkako ibiltariek eta ArtamugarriaKek eratu dugun hiruki erraldoi hau Bardeetako tiro-eremua salatzeko eta aldi berean Tibestiko Toubou herriari elkartasuna adierazteko ikurra da. Izan ere, Tibesti, eremu honetan entrenatzen diren hegazkinek bonbardatua gertatzeaz gain, planetako mina-eremurik zabalena da gaurkoan
Gatazken Maiatz edo arbolak gerra guztien aurkako gure salaketa adierazten du eta aulkien biribila, aldiz, elkarrizketaren aldeko gure apustua edozein bake prozesutan.
Giza-hiruki erraldoi honek besarkada solidario handi bat bidaltzen du Bardeetatik Tibestira eta bakea xede dituzten herri guztioi gure agurrik beroena, neguro beren artaldeekin Bardeetara dabiltzan Erronkariko artzainek Hiru Behien Zergan aldarrikatzen duten aldarrikapen hirukoitzean biltzen dena: Pax Avant! Pax Avant! Pax Avant!
Ondoren, Tibesti GKEren ordezkari eta Toubouen printzea ere baden Djomodek Euskal Herriari eta Poligonoaren aurkako ibiltarioi elkartasuna adierazten dien gutuna irakurriko dugu.

Euskal adiskide maiteok: Jomode dut izena eta Ekialdeko Saharan dagoen Tibesti edo Toubouen herriko printze bat naiz. Tibesti 560.000 km2ko lurraldea da eta lau estatutan banatuta dago: Egiptoko Hego-Mendebaldea, Libiako Hegoa, Txadeko Iparra eta Nigerreko Ekialdea. Toumagra leinukoa naiz, munduko zaharrenetakoa den Toubouen Errege-erreginen familiaren Arami dinastiakoa. Zouar dugu Toubouon antzina-antzinako hiriburua eta bertan Derdé edo Toubouon ohituren eta kulturaren monarka eta jagolea bizi da. Euskaldunok bezala Toubouok zuhaitz sakratu bat daukagu, Tari edo akazia, gure herriaren nortasunaren ikurra. Bardeetan, Euskal Herriko basamortuan bilduta zaudeten oraingo honetan, bakearen alde Euskal Herrian zein Tibestin, elkartasuna adierazteko eta eskerrak emateko mezu hau bidaltzen dizuet. Toubouok zein euskaldunok herri indigenak gara eta antzeko kultur balioak ditugu. Herri porrokatuak gara biok, historian zehar gerra eta gatazka pairatu izanda ere gure hizkuntza eta nortasunari eutsi baitiogu. (Saharako gure basamortuan bezala), Euskal Herriko basamortu honetan batzen gaituena Herrien arteko (eta baitako) Bakearen, Demokraziaren eta Elkarrizketaren aldeko ardura da. 1983 eta 1988 artean –Gerra Hotzean bete-betean– Libiar gerrariek Tibesti okupatu zuten, Toubou-aldra komunistak lagun zituztela, eta minez josi zuten Tibesti osoa. Egun, Tibesti, pertsonen kontrako mina gehien dituen lurraldea da munduan. (Horregatik) Toubouok pozarren gaude, euskaldunok, gure lagunok, elkartasun- eta adiskidetasun-eske dakargun mezuarekin bat egiten dutelako. Gure aldetik honakoa espero dugu: 2008tik aurrera, Bardeetako Tiro eremuan NATOko hegazkin militarrek bonba gehiagorik jaurti ez ditzaten eta Euskal Herriko basamortuko biztanleok arrisku eta beldurrik gabe bizi daitezen.